රන් මිල ඉහළට.

ලෝක වෙළෙඳපොළේ රන් මිල මේ වනවිට වාර්තාගත අන්දමේ ඉහළ යාමක් පෙන්නුම් කරයි.

කැරට් 24 රන් අවුන්සයක් සඳහා ඉතිහාසයේ මෙතෙක් සටහන් වූ ඉහළම මිල විදියට අමෙරිකානු ඩොලර් 2,141යි ශත 59ක් ඊයේ (05) වාර්තා වුණි.

පසුව ඒ මිල ඩොලර් 2,130ක් ලෙස සමනය විය.

පසුගිය දින 30ක කාලය සැලකූ විට ඩොලර් 100කට ආසන්න ප්‍රමාණයකින් රන් මිල ඉහළ ගොස් තිබේ.

මාස 06ක කාලය සැලකූ විට රන් අවුන්සයක මිල ඩොලර් 200කට වැඩි ප්‍රමාණයකින් ඉහළ ගොසිනි.

අවුරුද්දක කාලය සැලකූ විට රන් අවුන්සයක මිල ඩොලර් 315කින් පමණ ඉහළ ගොස් තිබේ.

රන් මිල මේ විදිහට කැපී පෙනෙන ලෙස ඉහළ යාමට ගෝලීය භූ දේශපාලනික උණුසුම විශේෂයෙන් බලපා ඇත.

ලොව පුරා මහ බැංකු රන් තොග රැස් කිරීමට පෙළඹෙන්නේ මේ විදියේ අස්ථාවරත්වයක් පවතින විටය.

ඒ වගේම ආසියානු වෙළෙඳපොළවල රන් භාණ්ඩ සඳහා ඉල්ලුම ඉහළ යාමත් රන් මිල ඉහළ යාමට බලපා තිබේ.

රන් මිල මේ ආකාරයෙන් තවදුරටත් ඉහළ මට්ටමක පවත්වා ගැනීමට වැදගත් වන සාධකයක් තමයි අමෙරිකානු මධ්‍යම සංචිතයේ නැත්නම් මහ බැංකුවේ පොලී අනුපාතිකය.

අමෙරිකානු පොලී අනුපාත මේ වසරේදී කපා හැරීමක් අපේක්ෂා කරන නිසා රන් අවුන්සයක මිල ඩොලර් 2,300 දක්වා ඉහළ යනු ඇති බවට විශ්ලේෂකයන් පුරෝකථනය කරයි.